Mosfellsbær 3.maí 2013
Í gær var hátíðisdagur í Skólahreysti MS.
Úrslit fóru fram í beinni útsendingu á Rúv frá
Laugardalshöll. Um fjögurþúsund
stuðningsmenn og áhorfendur komu í Höllina og stemningin og fjörið var engu
líkt og skilaði það sér vel heim í stofu.
Tólf skólar kepptu til úrslita. Keppnin hefur aldrei verið jafn jöfn og hörð
og það segir okkur að skólarnir eru farnir að æfa betur og betur og leggja
meiri áherslu á íþróttina.
Skólarnir sem kepptu voru,
Egilsstaðaskóli,Vallaskóli,Lindaskóli,Laugalækjarskóli,Gr.á
Ísafirði,Grundaskóli,Breiðholtsskóli,Holtaskóli,Gr.Fjallabyggðar,Síðuskóli,Varmárskóli
og Myllubakkaskóli.
Í fyrstu grein, upphífingum var það Hrannar Jónsson úr Lindaskóla sem tók flestar upphífingar eða 47 stk.
Armbeygjur sigraði Magðalena Lára Sigurðardóttir úr
Grundaskóla og tók hún 67 stk.
Dýfur tók flestar Kristinn Bragi Garðarsson úr Grundaskóla,
hann tók 62 dýfur.
Harpa Hlíf Guðjónsdóttir úr Vallaskóla á Selfossi hékk stúlkna lengst í hreystigreip, hékk hún í 4,37 mín.
Hraðaþrautina fóru hraðast Hildur Karen Jónsdóttir og Ernir
Jónsson úr Laugalækjarskóla. Þau flugu í
gegnum brautina á tímanum 2,14 mín.
Eftir ótrúlega spennandi keppni var það Holtaskóli sem
endaði í fyrsta sæti með 53,5 stig. Holtaskóli er þar með að ná þriðja sigri í röð í úrslitum sem er í fyrsta sinn í sögu Skólahreysti.
Breiðholtsskóli varð annar með 50 stig og Lindaskóli í því
þriðja með 49 stig. Í fjórða sæti varð
Laugalækjarskóli með 46 stig, Myllubakkaskóli í fimmta sæti með 44 stig,
Grundaskóli í sjötta sæti með 43 stig, Varmárskóli í sjöunda sæti með 41 stig,
Vallaskóli í áttunda sæti með 36 stig, Egilsstaðaskóli í því níunda með 30,5
stig, Síðuskóli í 10 sæti með 30 stig, Gr.Fjallabyggðar í ellefta sæti með 27
stig og Gr.á Ísafirði í því tólfta með 18 stig.
Munur á stigum hefur aldrei verið eins lítill og í ár. Skólarnir skiptu á milli sín toppsætunum alla
keppnina og ómögulegt að segja til um úrslit fyrr en eftir hraðaþrautina. Þvílíkur kraftur undir einu þaki. Krakkarnir eru sannarlega hetjur sinna skóla
og hreystimenni.
Til hamingju Holtaskóli öll sem eitt og sérstaklega Theodór
Sigurbergsson,Kolbrún Júlía Newman,Ingibjörg Sól Jónsdóttir og Guðmundur
Ólafsson – þið eruð frábærir keppendur og stóðuð ykkur vel. Ekki má gleyma Íþróttakennurunum, þeim Einari
G.Einarssyni og Bergþóri Magnússyni. Þeir eru lykilmenn skólans svo árangur náist í Skólahreysti.
En einnig langar okkur að þakka öllum liðunum sem mættu til úrslitakeppni. Við vitum hvað þið eruð búin að leggja gríðarlega mikið á ykkur. Árangrarnir sem þið sýnduð ÖLL í gær nást ekki nema með þrotlausum æfingum og dugnaði. Við vitum af öllum sárunum í lófunum og á lærunum og stressinu. Munið að þó þið hafið ekki endað á palli þá eruð þið einn af tólf bestu skólum á landinu í Skólahreysti. Þið eruð hetjur og hreystimenni ykkar skóla og vonandi nýtið þið ykkur þessa reynslu á jákvæðan og uppbyggjandi hátt. Að keppnin geri ykkur að enn sterkari einstaklingum.
Einnig viljum við þakka lykilmönnum okkar í skólunum sem eru íþróttakennararnir. Þið eigið miklar þakkir skyldar. Eins stjórnendum skólanna sem ár eftir ár sýna okkur traust og trúnað. Leggja á sig skipulagsvinnu með stuðningsmannahópa og greiða fyrir rútur á keppnisstaði.
Og síðast og ekki síst stuðningsmenn. Takk svo innilega fyrir allan kraftinn og fjörið sem þið komuð með inn í öll íþróttahúsin. Miklar þakkir.
Hér er slóðin inn á þáttinn á Rúv : http://www.ruv.is/sarpurinn/skolahreysti/02052013-0
Kær kveðja til ykkar allra og sjáumst hraust og flott á næsta ári
Ykkar, Lára og Andrés – Skólahreysti MS